Sic nostra servitia perfici volumus, ut occasione ipsorum fidelium nostrorum aliquis contra iustitiam non gravetur. Ideoque presenti sanctione decernimus, ut nullus officialis, si ipse equos habeat, occasione servitiorum vel nuntiorum nostrorum compellat aliquem equum vel iumentum ^.c. , asinum vel quodcumque vehiculum alicui commodare, sed proprium pro servitiis nostris locet. Quod si non habeat, licentiam habeat alios compellendi animalia pro servitiis nostris et pretio unius tareni auri per diem cum homine vel sine homine [f. 22v] pro dimidio tareno locare. Ceterum si locatum animal per manifestam ductoris negligentiam, vel quod ipsum ultra statutam dietam per malitiam duxerit, mori contigerit, iuxta extimationem trium vel quatuor bonorum hominum nostrorum fidelium, per quos, priusquam locatio fiat, extimationem locandi vehiculi fieri volumus, per curiam nostram domino pretium resarciri iubemus. Nullus etiam officialis compellat aliquem equos suos nisi iusto pretio curie nostre vendere, quod per quatuor bonos et probos viros volumus extimari.