Quanto ceteris terre principibus munifica dextera salvatoris in temporalibus nos prefecit, tanto saltim iuris naturalis instinctu ad antidota strictius obligamur, cum etiam veritate dicente ab eo, cui plus creditur, amplius exigatur. Quod in nostre mentis intrinsecus meditatione sollicita revolventes et illud etiam attendentes, quod solutio decimarum, quarum debitum utriusque tabulis testamenti firmatur, tanto in oculis Domini pretiosior redditur, quanto de bonis hominum decimalis oblatio velut electum quoddam et spirituale peculium a Domino reputatur, officialibus nostris universis et singulis presentis legis auctoritate mandamus, ut decimas integre, prout regis Guillelmi tempore, consobrini nostri et predecessoris, ab antecedentibus officialibus et baiulis solute fuerunt, locorum prelatis exsolvere absque omni difficultate procurent. Nos enim, qui faciente Domino inter homines sumus in preeminenti ^-: culmine constituti, quantum sine iniuria nostrorum regalium possumus tollerare, ecclesiarum iura et presertim earum, que in regno consistunt et quas sub protectione nostra recepimus et habemus, in nullo diminuere volumus, sed augere. Subiectis etiam nostris indicimus, ut decimas, quas de feudis et bonis suis antecessores eorum predicti regis Guillelmi tempore prestiterunt venerabilibus locis, quibus decime ipse debentur, cum integritate persolvant.