Predecessorum nostrorum, veterum principum, constitutionem, quam antiqua turbatio preteriti temporis antiquarat, nova provisione novantes edicimus, quod nulli subiectorum nostrorum, clerico vel layco, liceat domibus Templi vel Hospitalis seu cuilibet alii loco religioso, de quo nostre curie certum servitium minime debeatur, possessiones hereditarias vel patrimoniales vendere vel donare seu inter vivos aliquo alienationis modo, nisi ex equali permutationis causa, transferre. Ceterum si in ultima voluntate aliquem de predictis locis heredem instituerit vel aliquid sibi legaverit, tunc domus, que institutionem vel legatum acceperit, teneatur infra annum alicui de proximis defuncti vel de burgensibus nostris relicta stabilia vendere vel donare. Quod si ultra annum facere predicta distulerit, possessiones ipsas post anni lapsum fisci nostri iuribus volumus applicari. ¶ De rebus autem quibuscumque mobilibus quantumlibet pretiosis relinquendi predictis domibus et aliis religiosis locis concedimus omnibus liberam facultatem.