Iustitiarii ^.e. per provincias statuantur, qui non sint de provinciis, quas sibi magnificentia nostra decreverit, oriundi nec in eis habeant incolatum nec maiorem fortunarum suarum partem statuerint, ut assolet, in eisdem nec ibidem per se aut filios suos presertim acceptis in dotem rebus immobilibus contraxerint parentelas. Assessores etiam et actorum notarios de decretis sibi provinciis oriundos vel qui in prescripta causa fuerint, eisdem saluberrima provisione negamus. Et illud adicimus, ut post assumptum officium originarios sive [f. 13r] municipes de destinatis sibi provinciis in familiam non assumant nec ante magistratum assumptum ^-a assumptis de criminibus et offensis contra eos ante suum officium perpetratis iustitiam audeant ministrare nec adversarios eorundem ad querelas ipsorum coram sua presentia venire compellant, nullo per hoc preiudicio familiaribus suis conqueri vel accusare volentibus in causis, quarum cognitio presenti nostra constitutione differtur, in posterum generando. De criminibus autem, violentiis et iniuriis illis post officium assumptum illatis, de quibus ad eos cognitio pertinet, eis sicut omnibus de iurisdictione sua iustitiam ministrare procurent. Deinde generaliter prohibemus, ut in civilibus causis, preterquam de feudis non quaternatis sive parte feudorum ipsorum, nec principaliter nec per appellationem officium suum aliquatenus interponant.