Minoribus, qui etatis sue suffragio iuvari non possunt, imperialiter providentes statuimus: Si quando balium impuberum masculorum aut feminarum gerendum alicui serenitas ^.a. nostra concesserit, hii, qui balium gesserint pupillorum, postquam balium ipsum pubertate ^.b. superveniente ^.c. dimiserint, de administratione balii reddere debeant rationem, presente iustitiario regionis aut alio, cui hoc specialiter duxerimus delegandum, ita videlicet, ut deducto eo, quod curie, prout moris est, pro ipso balio dederit, necnon deductis iustis et moderatis expensis, quas pro victu et vestitu suo et quas in persona aut rebus pueri vel pro servitio debito curie nostre de hiis, que minor tenet, ipsum balium fecisse , constabit reliqua pupillo integre reddere teneatur. Quod si fraudulenter eum res minoris administrasse probatum fuerit manifeste, omne dampnum, quodcumque pupillo per [44v] fraudem ipsam contigerit, eidem de rebus suis resarcire cogetur et tantumdem sacris largitionibus nostris inferre, prava consuetudine, que hactenus balios a ratiociniis eximebat, in posterum quiescente.