Castra, munitiones et turres ab obitu dive memorie regis Guillelmi, consobrini nostri, erecta, super quibus minime diruendis maiestatis nostre licentia non processit, prout in Capuana curia per nos extitit stabilitum, renovata constitutione denuo diuri debere mandamus, publicationis pena ipsius castri vel novi edificii constitutionis nostre contemptoribus imminente, si usque ad nativitatem Domini proximam diruere edificata contempnant. ¶ Illud etiam presenti adiungimus sanctioni, ut nec munitiones reficere dirutas alicui liceat sine nostri culminis iussione.